انهى افضل لمبه اضاءه واستهلاك وتوزيع اضاءه وانبعاث حراري
جالى اسألة كتير انهى افضل لمبه اضاءه واستهلاك وتوزيع اضاءه وانبعاث حراري والرد هو جميع اللمبات البالب (الكرويه) مش هتديك كل حاجه، احلى حاجه عن تجربة التيوب 120 سم بيستهلك 18 وات بس والاعلى فاللومن يقترب من 1850 الى 2000 حسب الماركة وتوزيع اضائته هايل جدا بيفرش فرشه محترمه ومبتحسش بحرارته
طبعا تشتري براند بلاش التيوب ابو 40 ج
احلى حاجه في جروبكم مفيش صنايعية بالمعنى القديم اللي واخدها بالدراع ويخش يعدل علينا باشمئزاز وعامل ابو العريف، كلنا مهندسين ودكاترة ومحاميين بنتعلم ونفيد بعض وبنفتح اليوتيوب واى صنايعي بيفتح اليوتيوب بدون تنظير اهلا به
النهاردة عايز اتكلم على اللمبات الليد
هناخد بالنا من كذا نقطة
1.عامل السعر وده مهم جدا بسمع كتير يقولك شركة س او ص حرامية وكلها لمبات لا يا عزيزي مش كلها لمبات.
2.عامل الوات وطبعا كل ما انخفض كل ما كان احسن لفاتورتك.
3.عامل اللومن وهو قوه الاضاءه كل ما ارتفع كل ما كان افضل بفرض ثبات الوات يعنى لو لمبه 8 وات شركه س بتقدم 800 لومن وشركة ص بتقدم 900 لومن اخد ص طبعا.
كل اللي فات ربما يكون قديم ومكرر
اهم نقطة اللي جاية
4.عامل زاوية الشعاع وده جنني لغايه ما وصلتله
كان عندى لمبه فينوس 14.8 وات و 1500 لومن تقريبا مش عاجباني قولت بس اعدي على عربيه فينوس وانا راجع اجيب واحده اعلى وقد كان اشتريت 19 وات 1850 لومن تقريبا قولت هرجع الاقيها ضهر والمفاجأة النور قوي جدا تحتها وبقيه الغرفة حته قويه وحتة ضعيفة جننتي لغايه ما لقيت كل لمبه لها زاوية شعاع مختلفة عن الأخرى وممكن جدا الاضاءه الاضعف يكون توزيعها افضل وطبعا ده هيبقى واضح جدا فالبرندات الكبيرة اما الشعبي هو ميعرفش يعني ايه اصلا بيجيله المكونات متفككة وهو يجمعها وبيع!
5.درجة حرارة اللون وتقاس k كليفن ودى يعني اضاءه صفرا او بيضا ودرجات الابيض مش كل الابيض واحد في شديد البياض وفبه مزرق
6.الانبعاث الحراري ودى مهمه في المساحات الضيقة والغرف المكيفة وهى الحراره الخارجه من اللمبة.
