الوصايا العشر لأكل المانجة في مصر

1- 97% من بياعين المانجة لما تيجي تشتري منهم اي نوع وليكن نوع اسمه حسام مثلا، هيقولك، الله عليك يا باشا، دة انت اكيل مانجة بقي عشان تطلب تاكل حسام بالاسم

2- مرحلة الانغماس في اكل المانجة بتبدا من شراها وانت بتمسكها وتشمها وتدخل ريحتها علي نغاشيشك، وتداعب عقلك وتجري ريقك وتبتسم ابتسامة بلهاء لا ارادية وتعرف انها المانجة المختارة

the chosen mango

3- كفاية عنصرية بقي وتعصب لنوع واحد من المانجة، كل مانجة ذات شخصية مستقلة قوية هتفرضها عليك، الا لو تعصبك دة للفص العويس، فاتعصب براحتك حضرتك يعني

4- المانجة ما بتتاكلش بالواحدة

اغسلك تلاتة اربعة مثلا الا لو جايب صديقة الواحدة نص كيلو ولا فجر كلان الواحدة كيلو الاربع يبقي واحد كفاية اوي

5- المانجة ما تتاكلش عند ضيوف، اوعي تاكل المانجة عند ضيوف، برستيجك هيتبعتر يا رمضان يا سكري، اقولك لفها في كيسة سمرة

6- المانجة ما تتاكلش في الحمام ياخوانا مايصحش يعني

تتاكل في الصالون عالسجادة الغالية احتراما وتبجيلا ليها

وخلي حمادة ابنك ينبسط

7- المانجة المتقطعة اللي بتجيبها من عند بتاع العصير دي تجيبها لخطيبتك، عايز تدلع مراتك والولاد، مش عايز توسخ سجادة الصالون، لكن انا عارف وانت عارف ان جزء من حلاوة المانجة يكمن -واسمحلى اقول يكمن عادى كدة وسط الكلام -في عمل قُصة للبذرة مع امتصاص العصارة كاملة 3>

8- لو شافتك وانت بتاكل مانجة ولسة بتحبك اتجوزها

ونفس الكلام ليكي، ودة عن طريق مقياس#المانجو_ميتر لقياس مستوي الحب، معروفة

9- المانجة تاني اكتر شخص بعد ولدتك، اللي هتبسطك وتحنو عليك وانت زعلان وتفرّحك وانت مبسوط برضه

ييجي في المرتبة التالتة الملوخية والرابعة البيتزا

10 - الصدّيقة: خضرا في احمر وكبيرة ومليانة لحمة وعالمية عالمية عالمية،

العويس: صفرا ولازم تتاكل ناشفة والا تبقي باظت وطعمها حاجة اشي خيال

الفص العويس: اغلي الانواع واصغرهم وطعمها مقارب للعويس مع نكهة وسكر مضاعف، حاجة كدة افيون يتاخد حقن مش مانجة ابدا

الفونس: مستديرة وصفرا علي حمرا على اخضر

ولحمها برتقالي غامق وطعمها حلو جدا

التيمور: خضرا منقطة باخضر غامق وقليلة في السوق بس نكهتها مميزة حاول تجربها

الهندي: خضرا ولحمها قليل وعادة بتبقي حلوة بس السنادي شكلهم غشينها ولا ايه

السكري: صفرا وسكر ثم سكر ثم سكر وحاجة كدة علي قد الايد تنبسط

الزبدية: خضرا واحجام كبيرة ورخيصة والافضل للعصير والتخزين

- مش كل بلاد العالم عندهم التنوع في انواع واطعم المانجة زي عندنا -ودة مجرد جزء- كُل مانجة وانبسط، وخلي اغسطس يعدي بقي 😂😂